--------------------------------------------------------------------------------
لـ محمد بن عويضة ال دلعان الخنفري القحطاني
من سكان نجد ...... استقر في الرياض وتوفي سنة 1425 رحمة الله
زمت لي جبال الرين جعل الحيا ياطاه
تحدر على جوه هماليل وداني
على دار من قرنه على منحره يثعاه
على لبته يثعا كما عذق مسكاني
عليك الله واكبر يا حمام يجر غناه
على شاطي البركة يغرد بالالحاني
وانا وان سمعت مغنيٍ قلت واعزاه
وحسبي على اللي يوم غنيت ينهاني
وانا وان سمعت النجر يلعب على مهواه
تزايد فوادي في طواريه واشقاني
عفا الله عن اللي طال ليلي وانا وياه
وعلق لي البدرة على الدرب واسقاني
عليه اشقرٍ وان هب ليل الشمال ادفاه
وانا منه ساعه واتقي فيه واذراني
وانا ما ذبحني كون عند الوداع بكاه
وانا خابر انه مابكا الا على شاني
بكيت وبكا والكل منا عذابه جاه
ويا ساعةٍ فيها حضر كل شيطاني
قطع بي شعيب احدا وانا اسمع ونين بكاه
ودعيته بصوتين الضحا مير ماوحاني
وعشرٍ معا عشرٍ وعشرٍ بها رجواه
وعشرٍ مع عشرٍ وعشرٍ بها جاني
زمت لي جبال الرين جعل الحيا ياطاه
تهشم مخاييله على خشم بتراني
وسلامتكم
قد يختلف الرواة في ترتيب الابيات .... واختلاف بعض الكلمات .....
باقلم بن عايد ال سبعان مجلس الخنافر
منقول مجالس الخنافر الرسمي