الأمير معيض بن جعفر بن عبود حدثت في عهده وفي عهد اخوانه أحداث كثيرة لم تكتب فيها قصائد ولعلي اذكر شي منها وابيك (((يا وجه الجحادر تنشد شيبانك))) من الأحداث التالية:
1) ال حسين ال مسعود يوم قالوا لمعيض إبن عبود حنا بنغزي بلحالنا وبنطلع من ال مسعود وبنكون مستقلين في مغازينا،، وغزو على الدواسر ربع ابن قويد وسحتوهم الدواسر ولا عينوا خير،،، وعرف معيض ابن عبود بالوقعه وتوعد معيض الدواسر،،، فكان الدواسر متوجهين من الوادي يبون يروحون صوب السبعان وكانوا على راس بن قويد فشافوهم ال مسعود على راس معيض بن عبود وكان مع معيض ابن حويزي ال سويدان ووقفوهم وخذوهم ال مسعود كلهم وكان هاذا ثار للي خذوهم الدواسر من ال حسين.
2) عندك عتيبة غزة على ال مسعود (الشيابين على راس هذال بن فهيد_والنفعه على راس شبيب بن حجنه) وردهم هديف بن عبود بلحاله وعقّر 7 خيول كان كل ما ركب ابن فهيد خيل عطوه ربعه العتبان خيل يركبها ولا شافها هديف عقرها وعقب ما شاف ابن فهيد وقع هديف ابن عبود من الغزو على ال مسعود وكان نيّة هديف إنه يذبح شيخ الشيابين ويعقر خيله في نفس الوقت وتراجعو العتبان كلهم على روس شيخانهم هذال بن فهيد وشبيب ابن حجنه وعافو المغزى على ال مسعود.
3) عندك أحد ابناء الشيخ ابن محيّا العتيبي غزى على ال مسعود وقابله هديف بن عبود ولا عيّن خير،،، وتقابل جعفر ابن عبود وابن محيّا في أحد المرات وقال ابن محيّا لجعفر بن عبود،،، يا جعفر الطير اللي جاكم هو يحري بها والا ما يحري بها؟ قال جعفر الا يحري بها. فقال بن محيّا: انتم ذبحتوه مقبل والا مدبِّر؟ قال جعفر: الا ذبحناه مقبل.
4) عندك السبعان اللي غزو على ال مسعود ب (7) او (6) بيارق وردوهم ال مسعود وهم على 7 خيول مردوفه كل خيل ما فوقها إلا رجالين من ال مسعود،، وكان السبعان على راس قايدهم الفديع ابن باحص شيخ السوده والقصه كان يذكرها رجال سبيعي وعزوته (ابن شديّد) من اهل رنية أو الخرمة.
عندك بعد دخول الملك عبدالعزيز الرياض وبدأ في توحيد المملكه جا أحد الامراء واسمه (سعود العرافا) واخوه (محمد العرافا) وقال لقبيلة ال مسعود ابغاكم تغزون تجون معي ضد الملك عبدالعزيز لأنه كان مختلف معه ورفضوا ال مسعود طلبه فقرر إنه يغزي ال مسعود ومعه السبعان ولا عيّن خير وصوبوه ال مسعود وصوبو اخوه محمد وردو ال مسعود غزو السبعان وقال فيها معيض ابن عبود قصيدة يتحدّى فيها (سعود العرافا ال سعود) ويعلمه إن ال مسعود ماهمب شواوي ولا اتذكر القصيدة كاملة وانشالله ببحث عنها:
يا سعود ما حنا بشواوي.........................
............................لا انته ولا الراس الكبير
4) عندك مطير على راس احد شيخانهم إسمه بصيِّص المطيري جا بينه وبين ذيب ابن عبود طراد على الخيل وصارت مواجهه بينهم وطاح بصيِّص وقال ذيب بن عبود فيها بيتين/
ادنى الحيا خشم ذقان_واقصى الحيا بصيِّص مذبوح
............تشوف فيحان_.........................
5) عندك الفارس الدوسري اللي ماقدر احد يطرحه من حصانه تقابل هو وجعفر بن عبود وفكّ سلاحه على جعفر بن عبود واخطاه وفك عليه جعفر جنبيته المشهوره (الحلوش الذيب الابيض) وقطعة إيده الجنبية مع رقبة الحصان.
6) عندك الفارس (ونيَّان ابن حميد) اخو تركي ابن حميد،،، خذاه جعفر بن عبود بالحلوش (الذيب الابيض) وعقّر خيله جعفر ابن عبود.
7) عندك فخيذه من عتيبة يقالهم (الطويلات) أو (الطوالات) أو (الطايلات) لا احرف بالتحديد إسمهم تواجهو مع ال مريسن من ال ناجع ال مسعود وكسروهم ال مريسن على راس سرحان إبن مريسن ال مسعود وأخوه عيد إبن مريسن ال مسعود.
عندك عيد بن مريسن من ال ناجع ال مسعود الملقب (بعييدان الخيل) وهو الذي قتل الحجنه شيخ النفعه الذي صوب خاله وأخذ فرسيه المشهوره (العباس والعبيسه) وأعطاها لخاله الشيخ ذيب بن عبود عندما كان صويبا في محل إقامته من عتيبه وقال هذي هدية مني وعيد لسلامتك يا خال.
9) عندك حزام ابن عبدالله ال فهد ابن هادي بن عبود له موقف شجاع وهو اللي حول بالشيخ فيحان بن فيحان بن باحص من حصانه،،، والقصه إن فيحان بن فيحان بن باحص غزى على ال مسعود ويوم درى ذيب ابن عبود بان فيحان ابن باحص غازيهم كان معه أحد رجال ال الجمل (مريتعي) قال ميده الشيخ ذيب انت ابلك سبوقه ابغاك اتّيها علشان لا شافوها السبعان راحو لها وخذاناهم قام المريتعي وتيه ابله (8 من الابل) جوك ال مسعود لا السبعان ماخذين البل وقد قفوا بها السبعان وكان فيحان بن باحص حصانه سبوق ولا احد قدر يلحقه من ال عبود إلا حزام بن عبدالله من ال فهد بن هادي وطرده وحوّل بفيحان بن باحص من حصانه،،،وفيه قصيده قالتها سبيعيه/
اميرنا طريح لغيرهم............ومعناه إن ال مسعود طرحو فيحان بن باحص من حصانه طرحه حزام بن عبود وهو لا يتجاوز ال 19 عام وكان معه حصان سبوق اسبق من خيل ابن باحص ويقال إن القصه كانت مناسبة الابيات اللي قالها ذيب ابن عبود:
يا مرقب عسوه وعساناه_والبل داجت في النفود (يعني ابل المريتعي)
بغاها بن باحص وحن جيناه_بخيل يخضب عليها العود
10) عندك الشيابين عتيبه كانوا غازين على مطير وعودو بكسبهم لديارهم وفي طريقهم طاحو في ال مسعود وخذو ال مسعود جميع كسبهم اللي خذوه من مطير ولكن ذبح في المعركه فارس من فرسان ال مسعود (ابن دعلوج) واللي ذبحه هذال الشيباني.
11) عندك عرار بن عبود (راعي الباروده) يوم غزو الشيابن+النفعه+بعض قبايل عتيبة على (ذيب بن عبود وعرار بن عبود وهم مصوبين في معارك سابقه) وكفو ال مسعود منهم ماجوهم لانهم خذو بشور عرار بن عبود قال انا برميهم بالبندق ولا خلصت منهم حولو عليهم ويوم اقبلو العتبان على ال مسعود رماهم عرار وخلص منهم وحولو عليهم ال مسعود في باطن ولا عينو العتبان خير.
9) عندك قبيلة الخلاوي الحباب خذو 8 نوقات من إبل ال عبود ولا كان عندها إلا راعية بنت وخذو البل وتبعتهم البنت وقالت "على هونكم على هونكم،،،البل وراها رياجيل بيردونها" ولا ردو علاها ولا خلت البنت البل قامت تتبعها وما شافو إلا ال عبود واصلينهم على راس معيض وكسروهم من أولهم لاخرهم وبعد الكسره علموهم إنهم قحاطين من الخلاوي (الحباب)قال معيض روحو وسلمو لي على جراب شيخكم.
هذا اللي سمعته وعفاكم.
الكاتب الشرفاء عزوتي
مشاركة بن وصل الخنفري
يستاهلون من يكتب تاريخهم لانهم كتبوه بأفعالهم عبر الليالي والايام رحمهم الله جميعأ
عندي تعقيب على مقتل الشيخ فيحان بن فيحان ابن باحص وهو ان ابن باحص كان غازي على قبائل الجحادر ومعهم الشيخ عشق ابن شفلوت اللي تزوج امة ورباة اللين صار رجال ولة قصة مستقلة كانو الجحادر في السرة وابن باحص شاري لة غوج من العتبان واظنة من الدعاجين ويبي ثار ابوة وربعه وقد قال قصيدة حداء يقول فيها
شريت لي غوج من العتبان ... واظن في نفسي ظن الجود
وشلفا تلظى جات من نجران... يازينها لدرعت في العود
نبي انطارد خيل ابن سفران ... والا انشاري خيل ابن عبود
وحينما سمعو قصيدتة رد علية فارس الميال ال جريبيع وهو يقول تردى حظة عند الخنافر وال مسعود وقال
طارش ليا جيت فيحان ... ترى كثر الحكي يقرب المنقود
الصبح لركبنا على بنات رمهان .. كل حمرأ على حبل العنان تزود
وليا من جاء للرمك ميدان ... الرمح في راعى الغوج ينود
تواجهو وقال ابن سفران وابن عبود ياعشق هذا بزيك ولدك اللي انت ربيت قام عشق وقال يافيحان عود على شان اللي بيننا من عنوه قال ابن باحص حبالها مقطعة والعنوه طايح حظها بينا قال عشق دونك اياه ياجعفر وتواجه هو وابو ذيب وطعنه ابن عبود وذبحه
ومشكور على اللي اوردت من ذكر بعض وقائع الشيوخ ال عبود
