(ماعلى الدنيا حسوفه بعد لوي الذراع )
الثقه في غير أهلها ضياع من الضياع =ضاعة إحقوق الأجاويد بسباب الثقه
الأمانه ضيعًت والنقاء والصدق ضاع =والمبادي والقيم يافتات إمعلقه
المذاهب تتسع والذمم صارت تباع =ونقضت عهود الوفا والعهود موثقه
في زمان يلبس التاج فيه من استطاع =ويتبندق فيه من لايعرف البندقه
كيف نفرق راعي الصدق من راعي الخداع =مستحيل إنا بدون التجارب نفرقه
كل واحد يزعم إنه راعي الأمر المطاع = ذا يشابه ذا سلوبه وحكمة منطقه
يازمان العولمه والبدع والإختراع =الفتن تعصف بنا والعيون مشققه
واقفين موقف لاهجوم ولا دفاع = مثل من يرمي ويرما وهو في خندقه
يازمن لاعاد تلبس على وجهك قناع = مابقى شي تخفيه خلف الاروقه
صارت الاسرار في كل مذياع تذاع =عقب ماهي في قبور الصدور المغلقه
وصارت العورات وعراض خلق الله تشاع =والحيا والستر مغسول وجهه بمرقه
والصله في الاقربون اوشكت للإنقطاع =مابقى إلا الذكر منها يلصمق لصمقه
والفضايل تنخفض والرذايل في رتفاع =وانحلال اخلاقنا كل باب يطرقه
ومن يقول الصدق ماعاد يلقى الإستماع =لو تكلم باصدق القول محدن صدقه
نعرف إن الشر والخير دايم في صراع =وانتصار الخير مضمون رغم التفرقه
هاذا الدنيا إبتلاء وفتراق واجتماع =غدرها يقضي على كل صفحه مشرقه
كان هاذا حالها قلت يادنيا وداع = لو باتيه سنين من منطقه في منطقه
ماعلا الدنيا حسوفه بعد لوي الذراع = الله للي يخلق العبد وللي يرزقه
خير مافيها رضا الله لو شح المتاع =والفروض وماحصل من زكاة وصدقه
حكمة العاقل بدنياه عبره ونطباع =لادرا بان لذي لحق غيره يلحقه
التواضع منهجه والورع ولإرتداع = لو نزل من ناطحات السحاب بصندقه
حافظ عرضه ودينه وسره مايباع = حنبلي ينبذ اهل البدع والزندقه
قلتها للعلم والمعرفه والإطلاع =موعظه ينجا بها العبد لا الله وفقه
مع تحيات اللشاعر /مبارك محمد الرجباني الدوسري وشكرا
