قال مسلم آل عليان الجحادر في محمد ابن قرمله :

براهين على تزعم قحطان لنجد وعلى منزلة الشيخ الامير محمد بن هادي بن قرمله

اترك القصائد تتحدث عن الموضوع

قال مسلم آل عليان الجحادر في محمد ابن

يتلون هذاب السرايا محمد=أخو منيره زبن كل ذليل
مايركب إلا فوق كل شمره=إصيل ولا يعتلا إلا إصيل
والله ياشيخ يعاشي محمد=إن ذاك من بد الرجال هبيل

يقول احد شعار عتيبه في محمد بن هادي بن قرمله :

يالله من نو يثور قتامه=يسقي من العارض إلى نقرة الشام
نبعد عن اللي ما تحلل عظامه=عيت تبيده الليالي والايام
زريبه والضيط راحوا طعامه=وحنا يقزينا المنازل من العام
لا شب ضوه في راس العدامه=قمنا نربط غالي القش بحزام
زريبه والضيط من شيوخ عتيبه

هذة قصيدة للشاعر ضيدان بن عبدالله الروقي القحطاني
عندما سمع احد الاشخاص يتكلم في قبيلتنا العزيزة ......

رد عليه بهذة القصيدة وهي :

ياللي علينا غيرك هرج واشيـــن=حنا ترا هرج الهمج ماسمعنـــــاه
لاتحســـــــبنّا بنتـرجا مـقـفـّيـــن=من صد عنا وابتعد مارجينــــــــاه
ياشايفٍ نفسك ترانا قحاطيــــــن=من شاف نفسه تحت الاقدام دسناه
من خلقت الدنيا وحنا سلاطين=وكم عز قوم بالمعارك كسبناه
يشهد لنا التاريخ يومٍ على تيـــن=عز الشريف وقوم ابن ضاري خذينـاه
حنا بنجد المجد عالعز راسيــــن=والسيف في دم الاعادي سقينــــاه
تاتي لنا الجزيه من يسار ويميـن=تاتي لبن هادي على جال مركــاه

يقول عبيد بن رشيد في ابن هادي :

جانا جوابك يالشجاع ابن هادي=تقول لك بكروش عندي مثاني

وقال في موضع آخر مخاطبا عباس باشا :

يابيه انا لكروش لااهدي ولاابيع=قبلك طلبها فيصل وابن هادي

من قصيدة الشاعر/ سعد القرقاح العبيدي القحطاني ، عندما حل على القبابنة من السهول يمتدحهم لجميل اكرامهم له ، ومنها ذكر طرفا عن جماعته ، ويقول فيها :

قلته وأنا مانيب راعـي مواكيـل=مير أعجبوني بالكرم والشجاعـه
قلته وأنا من روس ربعٍ مشاكيـل=اللي خذوا علمـان نجـدٍ قلاعـه
آلاد قحطانٍ كمـا دافـر السيـل=اللـي ظعنهـم للمعـادي مراعـه

وقال تركي بن حميد ممتدحا ابن هادي :

ياراكب من فوق سلسات الاقران=فج العضود وساسهن من عماني
ملفاك من يروي شبا مقدم الزان=عيد الركاب اللي بها الحيل واني
شيخ نشا بالطيب من روس قحطان=عاداتهم فك النشب والعواني

ويقول :

ملفاك شيخ بالقسا يذبح الكوم=شيخ وشيخان القبايل تدله
تلقى محمد زبن من جاه مظيوم=زبن الذليل اللي مخيف محله
شيخ على الشيخان له حق ورسوم=تخاف من غيضه وتمشي رضا له
جانا من الشايب مكاتيب وعلوم=حي الكتاب اللي لفى حشمة له
الشايب اللي ينقل الكبر والزوم=باغي لحكمي مير انا عاصي له
الله يغشك يوم غشيتنا اليوم=تقرا الكتاب ولا تهاب المظله

ليه تدله !! عشان تقدم الجزية وتكسب وده
ولاتهاب المظله : اي لايخشي خوض المعارك

ويقول :

يالله ياللي ماش حال يكوده=رب لطيف صرف الريح تصريف
ارحم اللي وحدوا به جنوده=حد صلح وحد تحدر على السيف
وش يقصد بحد صلح !! يعني ادى الجزية لابن هادي

ويقول في قصيدة له أخرى :

منصاك ابن هادي ريف هشالة الخلا=ريف الهجافا في ليالي عسورها
في مجلسه تلقا علوم طرايف=وحيل تاطاها كل يوم قدورها
قل له طلبنا الصلح منكم ولا حصل=ودنياك مايسقم بها الا صبورها

ويقول الشريف سلطان :

جانا جواب معرب الجد معروج=ومعسر لكن حنا فهمناه
جواب من ياخذ على نجد مخروج=ياخذ على من حل في نجد الشاه
وش عاد لو عيا محمد على الغوج=بخيل الطواله واحد كنه اياه
إلى ان قال :

انتم سهيل له مطاليع وبروج=وحنا القمر ليلة النصف غطاه

ويقول عايض بن فهيد الرشيدي للامير خليل بن ناصر بن قرمله :

تهدا عليك مقاضعات الحديدي=واهدوا على جدك جميع البوادي
كل على هرجي لك الله شهيدي=ولا اقول انا هرج على غير قادي
ويقول راكان بن حثلين :

ملفاك ابن هادي كبير العمامه=شيخ ورمحه مع هل الخيل مرسام
اهديت لك نور السلف والجهامة=ابغيك ذخر في مقابيل الايام

ويقول الجضعي الفهري :

ياراكب وجنا تبوق المراهيق=كنه ظليم حاديته الخشومي
تنصا لنا شيخ دلاله على سيق=محمد ولد هادي مرد العلومي
يعطونه الاجناب قب ملاويق=وخذا الاصايل من الاحفة رسومي
ويقول عيسى بن حصن الشرافا الدوسري :

ياراكب من فوق درم الخفافا=مافيهن اللي مابعد شق نابه
تلفى على شيخ فعوله تشافا=مشيدن بيته تخالف ركابه
عليه شيخان القبايل تلافا=ذا ناقلن هدوه وهذا كتابه
ويقول محمد بن رثوان الروقي :

خله يامن له ويوم غدا له=من فوق مطوي الحشا كنه الذيب
ملفاك شيخ ماتوني دلاله=تلقا العوادي وسط بيته مراقيب
حطيتني ياشيخ مثل الخياله=وان الخلق مايمنع الضان في الذيب

ويقول تركي بن جليغم الفهري :

لما تقهوا روحه لابن هادي=مادام راسه بدت الناس ماجود
ياما حكم نمرا تخفض الفؤادي=مسواط نجد إلى غدا نجد مرجود
يتلاه من قومه سوات الجرادي=كم واحد في دقلهم شيف مردود
يعطونه الحكام قب جيادي=وسروال تومان مع جوخ ماهود
يقول ابن شافي :

ملفاك ابن هادي كبير العمامه=مكدر الصافي بعجات الايام

ويقول محمد بن هادي بن قرمله عن نفسه :

مامنكم اللي تلهن بالخنانيق=وانا ذراكم عن لهيب السمومي

الى ان قال

انا جملكم في نهار المساويق=ان جا من العدوان خيفت علومي
اشيل من ربعي من الغيض ماطيق=ولو انهم زعلين عندي حشومي
أنا أحمي المظهور لانشف الريق=لما رمى المجمول بغطاه يومي
نجد خذيته بالسلف والتفافيق=وخيل تعاقب مثل طابور رومي
والحظ من الله بخط وتوفيق=والعمر يفنى والليالي تدومي

وكذلك قال :

يامن يخبر شافي ترى نجد ممطور=ووادي الرشا ماياخذ الا ملاله
قل له يتنصى منزله قاعة الضور=ينصى غدير الشظو لما امتلا له
وفي قصيدة اخرى له تحدث عن موضوع معين ثم ذكر عرضا منعة قبيلته وحمايتها لديارها بنجد :

يافاطري ياللي ثمنها ثلاثين=والا معانقة الجمل باندفاعة
ياما رعت من باطن زاهره زين=ميرادها عد تعاوي سباعة
يبرى لها قب سواة الشياهين=قب الى هد القواصر قطاعة
بديارنا كل العرب عنه عجزين=والا ترى قومي غدوا به طماعة
وقال :

ياراكب من فوق عشر ضواتي=سبق القطا اللي نابغ من مطيرة
مرباعها يم الحوم وسفواتي=في ماقع ماهو يقزى بعيرة
ملفاك تني حامي الجاذياتي=قل الفرس فيها دعاوي كثيرة
اديتها بحبالي الوارداتي=يوم ارتخت عنها الحبال القصيرة
وقال موجها كلامه للشريف سلطان :

نحدكم حد الجوازي عن الموج=ونردكم رد البدن صوب مسناه
هل سربة وان دبرت ركضها عوج=وان اقبلت شروى الحرار المغذاة
كم عندل تبكي على العم والزوج=تجر صوت غافي النوم قزاه
وكم سابق تشرى من المال بخروج=غدت بروس رماحنا بالمثاراة
انا جنودي كثر جوج وماجوج=حريبنا لو هو بعيد نصيناه
حريبنا مايمرح الليل مفلوج=والناس قد ناموا وعينه مقزاه
وعدونا لو قطب الخيل بسروج=لازم يخلي منزله لانصيناه
ذا قول من يلوي على الهرج بهروج=يلوي ولا يلوى على بعض ملواه

وقال موجها كلامه لراكان بن حثلين :

لابد من يوم نثور عسامه=اما على المطران والا على يام

الى ان قال :

لي لابة حولتهم من تهامة=سلاحهم مخ الفرنجي والاروام
حنا كما سيل يطم العدامة=حول على طاش البحر له تلطام

الى ان قال :

كم شيخ قوم مطلقين حزامه=من عقب الجوخ قدوا له الخام

وقال امام الامام فيصل بن تركي :

لو كنت عود لي افعول عنايف=وربعي اتطاوعني على الهون والكود
حنا على ضدك جبال نوايف=وحنا لك اطوع من عنيبر ومسعود
لي لابة تروي حدود الرهايف=لا جا نهار فيه حاوي ومردود
مانشتحن من حرب كل الطوايف=والى بدا لازمك حنا لك جنود
شد العتيبي من ورا كشب خايف=ولا يحدر كود يبرى له القود
وشد المطيري من خشوم الردايف=وان سندوا وردوا حنيظل وابا الدود
لي لابة ماجمعوا بالحلايف=من نسل قحطان وتعزا على هود

وقال له ايضا :

اللحف يبغضني على لطم خده=ولوني عليه هوين صرت غالي
عندك يصرف بي من الحكي قده=وفعولنا فيهم جداد وسمالي
صلال دور له ورا المستجده=والشيخ الآخر في مرب التوالي
ووطبان اللي قد كل الرمل خده=خلوه ربعه في مداس العيالي
لي لابة لا قلت للخيل رده=ترايعوا للهوش مثل الجمالي
وفعولنا بالضد كل يعده=يعده الاول لنسل التوالي
ربعي لي اطوع من محب لوده=وانا اروف بهم من مربي العيالي
اتبع مصالحهم بلين وشده=واكسر بهم عظم الحريب الموالي
وان جت من العاقل عرفنا مرده=ولا نلتفت لهروج بعض الرجالي

ويقول رادا على تركي بن حميد :

اطلب عسى نجد من الوسم ماسوم=حتى تقرب حلة صوب حلة
وان كان رمحك بأول الخيل ملحوم=فأنا برمحي حامي نجد كله
من شافنا بالحلم فرقز من النوم=ومن شافنا بالعلم بطنه يحله
عدونا لو جض فلا هو بمليوم=واللي وراه يجض من جضة له
مانشتحن للحرب والحرب مفهوم=وياسعد من حن في اللقا فزعة له
حربك الى جانا نقلناه بسهوم=وتر حربنا لاجاك ما احتلت شله
وان كان تطري النجم والنجم مفقوم=النجم يدوي والجبل راسي له
ولو هو في نفسه فلا هو بمليوم=نعم الشوارب وافي الشبر كله
مشبه ما بين عتبان وبقوم=والله علم في دق سلكك وجله
ويقول رادا عليه في قصيدة اخرى :

ياتركي بن حميد وان كنت صادق=فارجع بقومك لاتولي دبورها
نجد تبرا منك وبنا ترحب=تبدي لك البغضا ولا طعت شورها
فإن كان يابن حميد ماطعت ناصح=فترا الوعد لا من ركبنا ظهورها
فإن كان جمعاكم خذت ثوب راعي=فترا جمعنا ما يأخذ الا ندورها
بني مظيم وان تولوك ساعه=يشدي ليوم الحشر نفخات صورها

وقال محمد بن عديله العاطفي في الامير خليل بن قرمله :

عسى يعل الرين من كل ودان=دار الرجال اللي تفك الحدودي
والله ما اسكن دون ذربين الايمان=اللي فعايلهم عليها شهودي
اول مجيي عند من يذبح الضان=اهل الهداوي يطلبونه عهودي
خليل اللي يمنع الدرك الامان=اللي على خصمه يقود الجرودي
ساس الكرم والجود ميراث جدان=وان جاه مظيوم فيرقا سنودي
شيخ ولد شيخ سلايل كحيلان=حصان الصرايم بالرسن فيه زودي
كم جاه من قحص الرمك علط الارسان=يازينها قدام بيته تحودي
نادر حرار ماكره راس مابان=ما يبدي الا عاليات الرجودي
بديع السوابق يدعي الريش نثران=مثل الاسد مايلطم الا الخدودي

وحديثا قال الشاعر عايض بن حماد السحيمي قصيدة في الشيخ الامير سلطان بن خليل بن ناصر بن عمر بن قرمله:

ياراكب مـن فـوق جمـس مـورد=تـوه جديـد مشـتـراه وموديـلـه
الجمس حوض ولا على حوضه الشد=مافـوقـه الا سايـقـه والدليـلـه
مشـراه لـلازم ولاهـوب للـكـد=لا دق سلفـه سايقـه فـر ويـلـه
منصاك سلطـان الشجـاع الموكـد=اميرنـا اللـي لا دعـانـا نجيـلـه
ماهـوب اميـر بالتـوابـع تـعـدد=ومن لا كمـل عـد الميـه عزتيلـه
اماراتـه ميـراث جـد باثـر جـد=شيخ مـورث شيـخ شمـل القبيلـه
له موقـف يـوم الحـرم مـا تنقـد=فادا بروحه ما حسـب مـا يجيلـه
قاد الكتيبه لين داسـت علـى الخـد=خـد المعـادي بالـحـرم بتهليـلـه
يقـدم عيـال مابهـم واحـد صــد=مامنهـم اللـي يتقـي فـي زميلـه
ماهابـو البـارود واليـوم الانـكـد=وتركز لهم البيضا بـراس الطويلـه
ونجاه ربه واحمـد الـرب الامجـد=وكسـب النفيلـه والعلـوم الجميلـه
ولاهيب تستكثـر ولاهيـب تجحـد=هذي مواريـث ورثهـا وهـي لـه
يعيش ابـو خالـد وفـا بمـا تعهـد=ما همـه البايـق ومـن ينتمـي لـه
ولـد خليـل لـه خلـيـل تسـنـد=ابو حمود عـز لمـن يرتكـي لـه
قصره بفرعـة وادي الريـن مشيـد=على الطريق ولا اتقـا فـي نزيلـه
له ربعة للضيـف مصـدر ومـورد=ملفـا لهشـال الخـلا كـل ليـلـه
فيهـا الشحـم ودلال بــن تقـنـد=بهيل الحبش والعـود الازرق يهيلـه
ذباح كوم البل لمـن شحشـح المـد=كريـم سبـلا فالسنيـن المحيـلـه
يمناه في جـزل العطـا مـا تـردد=تعطـي عطايـا وافيـات جزيـلـه
يفرح به اللي ضامه الدهر والضـد=زبن المجنـى اللـي ربوعـه قليلـه
اخو منيره درع لمـن جـاه يطـرد=خليـل لا شـب الـزنـد فالفتيـلـه
ونشب المشط في ضافي الدقن الاربد=في ساعـة وابليـس يومـي شليلـه
وقف لها خليل فـي موقـف الجـد=وداوا الكبـود اللـي سنيـن غليلـه
ولا كـل عـد ينذكـر لـك بمـورد=وهداج تيمـا مـا يـوازي الثميلـه
وسلطـان كنـه ابـوه لـو مانعـدد=يهـوم هامـاتـه ويفـعـل فعيـلـه
ونهـار دخنـه بـذكـره واتمـجـد=بمجـد يتمجـد كـل يـوم وليـلـه
لراعي البويضا ناصر جد مـن عـد=لا قيـل ناصـر قيـل خلـو سبيلـه
قابـل جـرود مـن جـرود تسانـد=ووقف لهـم وقفاتـه اللـي مهيلـه
من الضحا حتى دجا الليـل الاسـود=وافتـك ربعـه والمحـارم وخيلـه
لاجل الخلوج اللي تدوج على العـد=تقنب قنيب الذيـب وتعـول عويلـه
لعيـون ترفـات الصبـايـا تقـعـد=للخصـم لا بـار العميـل بعميـلـه
يطعن برمح ويضرب بسيف اجـرد=وسوا سوايا مـن حضرهـا تهيلـه
حتى يمينه يبسـت بمقضـب الحـد=مافكـهـا الا بالسـمـن والمليـلـه
وغيره شيوخ ما اقدر احصي لهم عد=كـم شيـخ قـوم وسـدوه النثيـلـه
ترثة ولـد هـادي المسمـى محمـد=شيخ الشيوخ اللي الهـداوي تجيلـه
وشيوخ وقت اليوم مـن دخلـه ازود=وان جيت اقول الشيخ لاهـي ثقيلـه
هذا زمان صـار فيـه الجـزر مـد=والمد جزر وكـل ينظـر حصيلـه
الشيـخ مـن جتـه الهـداوي تقـود=وقاد السرايـا بالسيـوف الصقيلـه
يقدم بني عمه هل الحـرد والسـرد=وساق المعادي ليـن خـلا الحليلـه
هذاك بن هـادي لـه النـاس تشهـد=والله يشهـد والسـمـا والمسيـلـه
وكل القبايل ما اقدر اهضم لهـم مـد=اللـي مقـاودهـا تـفـك الدبيـلـه
ولا قلتها مـن شـان مـد ولا جـد=لا شك اقول الصدق واثبـت دليلـه
ولو قلت زور قالت الناس لـي لـد=والكـذب عيـب للرجـال وفشيلـه
وصلو عدد ما قمـري البـان غـرد=على النبي واعـداد وبـل المخيلـه

وهذه قصيدة حمد الحبابي في الشيخ سلطان بن خليل بن قرمله :

سلطان ركب شداد ابوه وعمامه=ومع الحرار الشقر ضخم رصيده
جده محمد قادنا من تهامه=من باب صنعا قادنا والحديده
اسرج حصانه واعتصب بالعمامه=وقاد الجحادر والحباب وعبيده
وساروا بمسراحه وناموا بمنامه=سنحان وشريف وقبيلة رفيده
تتلا زعيم يستحق الزعامه=شيخ لهم وأرياه دايم سديده
حول بنا سيل يطم العدامه=وطبع العرب والجيش يتلا عقيده
وحدر بنا بين الحصير وسنامه=يبغي قرارة نجد ويفيد فيده
نفصخ كتامه وان تلقا كتامه=لما انجلى وحده نطحنا جديده
حتى ضربنا نجد شرقه وشامه=وان حل بره ما نوينا شديده
يالله عسى الجنة منازل عظامه=عود جذبنا من الديار البعيده

وآخر شيء أقول كما قال الامير هزاع بن عمر بن قرمله راثيا عمه محمد بن هادي :

ما اخبلك ياباغي الحكايا تزيده=مراجل ومحمد قد خذاها
كل المدايح حطها في مزيده=وكل المراجل فوق راسه طواها

وسلامتكم

» الشيخ "محمد بن هادي بن قرمله
» قصائد الشيخ محمد بن هادي بن قرمله"
» الجحادر وابن قرمله
» الأمير/ محمد بن هادي بن قرملة رحمه الله ( أمير قحطان وسلطان نجد )
» محمد بن هادي بن قرمله